حب مستحيل بقلم ساره اللومي

اول مره احس بحلاوة إيد زي دي من حد غير محمد افتكرت لما نادر كان بيحط ايده عليا كان جسمي بيتكهرب كأنه عفريت ! فضلت ابص على إيده وابتسم عشان ما يحسش بالخۏف ويقدر يتكلم براحته لاني متفهمه طبيعته وخجله الزايد خصوصا إن دي اول مره يتعامل فيها مع بنت
وأخيرا قدر يتغلب على خجله وينطق !
أحمد على فكره يا بسمه 
انا بحبك من زمان قوي من ايام الجامعه رغم اني مكنتش اعرف عنك حاجه ولا عندي الجرأه حتى اسأل عنك اي حد كنا بنروح سوا ونرجع سوا كل أسبوع وفي نفس الاتوبيس كنت استناكي لحد لما تطلعي عشان اتطمن عليكي واطلع انا .
و انا مصدومه من كلامه ببص له ببلاهه ! بيقول ايه دا يعرفني وبيحبني كمان ومن أيام الجامعه 
كمل كلامه انا عارف إنك عمرك ما إنتبهتي لوجودي بس احنا كنا بندرس سوا في نفس الجامعه ونفس التخصص كمان واحنا ولاد بلد واحده وعارف انك انتي ما تعرفيش حد هناك ولا عندك صديقات ودايما كنتي لوحدك وكنت بحس نفسي مسؤول عنك في بلاد غريبه عن بلدنا ودايما كنت بأحرسك من بعيد من غير حتى ما تحسي بوجودي او تتضايقي مني كنت بدعي ربنا ليل نهار وفي كل صلاه انك تكوني من نصيبي ما انكرش اني مر عليا وقتين من الاوقات افقد الامل اول مره لما اتخرجنا وحسيت اني مش هاعرف اوصلك تاني ولا اسأل عنك مين بس رجعلي الامل لما لقيتك معايا في نفس المدرسه مكانتش صدفة كنت حاسس إنه طريقنا كان واحد و أن دعائي هو اللي رجعك ليا والا مكنتش لاقيتك تاني !
وتاني مره وانا بشوف في إيدك الدبله إياها وقلبي كان بيتقطع اني كنت جبان و مكنتش قادر ادافع عن حبي ليكي وسبتك تضيعي من قدامي تاني بس أول ما شوفت الدبله اتقلعت من صباعك وانا عملت مجهود جبار وفاتحت الناظر بتاعنا في الموضوع..
بصيت عليه لقيته بيضحك و بيسترجع ذكريات ..
قولتله بإستغراب ايه اللي بيضحك في موضوع الناظر 
كمل بإبتسامة تعرفي ايه اللي خلاني اتشجع واطلب منه إنه يسألك 
انا بذهول إيه !
عشان فاكر اول مره جيت فيها هنا على المدرسه بتاعتكم كنتي انتي اتعينتي قبل مني وانا مش عارف لسه اني هالاقيكي هنا معاي الناظر اخدني على مكتبه اول حاجه وعرفني على مدرسين المادة واسماؤهم وخبرتهم عشان لو احتجت حاجه اسالهم ووصل ليكي قالي ايه آخر منصب هيا بسمة وعلى فكره هيا آنسة وغمزلي وكمل و حلوة و أصغر منك لو كنت مهتم يعني هو ضحك ساعتها وانا اتلبكت قولتله بإرتباك انا جاي اشتغل حضرتك مش جاي اتجوز مكنتش عارف أنه بيتكلم عليكي لكن اول ما طلعنا برة و شاورلي عالمدرسين و قالي هي دي بسمة
شوفتك و عرفت فورا إنك من نصيبي وعرفت إنه ربنا نطقه عشان يديني إشاره انك بتاعتي ومكتوبه ليا من زمان والمهم الحمدلله إن ربنا استجاب لدعائي وجمع ما بيننا يا بسمتي 
انا كنت قاعدة افكر بذهول و أقول في نفسي ياااااااه كل دا عشته لوحدك يعني طول الوقت اللي انا كنت فيه بحب واحد من غير ما يعرف بوجودي كان فيه واحد تاني بيحبني وبيتمناني من غير انا كمان ما اعرف بوجوده دا ايه غرابة الاقدار دي 
كنت بسمعه في ذهول ومش بنطق ولا كلمه سايباه على راحته خالص يتكلم ويقول كل اللي في نفسه وفي قلبه هو كان خجول في الأول بس اول ما ابتدأ يتكلم كأننا كنا مخطوبين من زمان بيتكلم بحريه وبيعبر عن شعوره بمنتهى الرقه والأدب حكينا كتير بعدها عرفته عن نفسي وعرفني على عيلتهم وعاداتهم وقضينا يوم حلو لدرجة اني كنت حاسه معاه بفرحه غريبه و أمان ما اتعودتش عليه قبل كدة ! اخر حاجه قبل ما نمشي قالي اه صحيح انا نسيت اقولك أن أمي جايه عندكم بكره تحدد معاكم معاد الفرح انا عاوز بالكتير 20 يوم شوفو هتقدرو تكونو خلصتو ترتيبات ولا لا .
عشرين ايه ازاي دا احنا اصلا ما عداش على خطوبتنا شهرين دي حتى اول خروجه لينا
مع