حب مستحيل بقلم ساره اللومي

اسبوع ومش كده وبس دا انا كنت عارفك من اربع سنين من لما كنتي في اولى جامعه كنا كمان بنطلع مع بعض كل أسبوع وبنرجع تاني وعارف إنك عمرك ما لاحظتي دا وابتسم وخدوده اتوردت ! وانا كنت مصدومه من كلامه دا كان بيراقبني بقي من لما كنت في الجامعه يا نهار اسود!
المهم عدت محطته وما نزلش زي المره اللي فاتت وفضلت انا متنحه مش عارفه أقول ايه زي الهبله ساكته نزل معاي في محطتي وسابني مشيت شويه وراح جاي ورايا وعرف بيتنا فين !
دخلت البيت وشي مخطۏف وأمي بتسألني مالك قولتلها زي حكاية كل شهر وخبيت عنها حكاية أحمد دا اللي كان بالنسبالي لغز غامض الحمدلله إنه آخر يوم دراسه وخدت اجازه خلاص يعني مش هيلحق يكلمني ولا يشوفني .
بس اللي حصل انه ابويا جه بعد اربع ايام وقال لأمي إنه فيه عريس متقدم لبنتك قوليلها تجهز نفسها عشان جايين يشوفوها بعد بكره وامي جايه فرحانه تزفلي الخبر
يوووووووه بقى !!! هو احنا مش هنخلص منها السيره الزفت دي ! كل شويه ينطلي واحد !
يعني ايه يا روح امك عايزه تعنزي وتقعدي في وشي انتي كمان مش كفايه عليا سعاد وقرفها اللي ما رضيت تقبل بحد حتى !
يا أمي وانا مالي ومال سعاد هي عنزت تتفلق بس انا صغيره ولسه 22 سنه ح مستعجله على جوازي ليه !!
عشان لو فضلتيلي كده هيفضل المحروس بتاعك دا كل شويه رايح جاي ويقرفنا دا عدت سنه وهو لسه مش راضي حتي يحل عننا كل شويه يرجع لابوكي ويطرده .
محمد رجع تاني ! امتى الكلام دا ! وليه مش بتقوليلي عن اي حاجه تخصه
دي حاجه ما تخصكيش ويلا عشان تعملي حسابك الجماعه جايين بعد بكره .
راحت وهيا بتضحك وفرحانه اني هتخطب وفضلت انا افكر يا ترى مين دا اللي جايلي معقول لسه فيه ناس بتتجوز كده هو احنا في العصر الحجري ولا ايه !
المهم ما علينا جيه يوم الجمعه والحمدلله سعاد وجدتي مكانوش في البيت كانو راحو يقضو الاجازه في البلد لانهم متعودين لازم كل اجازه يسافرو يعني محدش جابلهم سيرة الجدع دا ولا يعرفو اصلا إنه في ناس جايه عندنا تطلب ايدي 
لبست فستان وردي طويل وحطيت كحل بس و روج وردي وسيبت شعري مفرود ودخلت عليهم وانا اصلا مش عارفه هما مين لحد دلوقتي !
دخلت احط الصينيه قدامهم لقيتهم كلهم بيبحلقو فيا حسيت جسمي اتنفض من نظراتهم والكوبايات كانو هيوقعو مني 
نطقت أمي بفخر دي بقى عروستكم بسمه إن كان فيه نصيب .
وبصتلي وقالتلي و دي حماتك ام أحمد و اللي جنبها دي عمته ودي خالته ودي مرات عمه .
أمي كانت بتسميلي كل الستات دول وانا كل تفكيري في مين هو أحمد دا !!! معقوله يكون هو ! طيب هو لحق يتقدم لابويا بالسرعه دي ! بدات امه تتكلم ونظرات الإعجاب ظاهره في عينيها بصراحه أحمد ابني خجول جدا وبيتكسف حتى يقعد يتكلم وسطينا دا احنا لحد الساعه دي جايين معاه واحنا لسه مش مصدقين أنه اتجرأ اصلا وشاف واحده واتكلم معاها كمان وضحكو كلهم وبعدها كملت عمته بس ليه حق يطلع من كسوفه البنت تستاهل الجرآه والصربعه اللي صربعهالنا دي !! دا حتى جدته اټوفت ولسه ما كملت الأربعين قولناله اصبر حتى بعد اربعين جدتك وهنخطبوهالك بس هو حلف علينا راسه والف سيف لازم نيجي نشوفك على الأقل ونتكلم عليكي بعدين نبقى نقرأ الفاتحه ونعمل كتب الكتاب براحتنا 
يا نهار اسود !! دا الراجل كان بيتكلم جد جاي وناوي يكمل فيها كمان اعمل ايه انا دلوقتي طيب ! أمي وافقت على طول وقالتلهم في وشي دا شئ يسعدنا ويشرفنا وأكيد مش هنلاقي احسن من ابنكم .
واول ما الجماعه طلعو روحت وقفت في وش أمي انتو ازاي توافقو عليه من غير ما تسألوني عن رأيي حتى هو انتو اللي هتتجوزوه ولا انا ! ردت أمي بسخريه واسألك ليه ما انا عارفه انك مش بتفكري غير في المحروس بتاعك وبعدين انتي ليكي عين تتكلمي وبتتشرطي كمان